Nithyananda plea against Madurai adheenam rejected

Posted by: Sudha Published: Tuesday, January 29, 2013, 12:01 [IST]

மதுரை: மதுரை ஆதீனம் அருணகிரிநாதர் மீது நித்தியானந்தா தொடர்ந்த வழக்கை மதுரை கோர்ட் தள்ளுபடி செய்து விட்டது.

 தமிழக இந்து அறநிலையத்துறை ஆணையர் தனபால், மதுரை மாவட்ட முதன்மை சார்பு நீதிமன்றத்தில் ஒரு மனு தாக்கல் செய்து இருந்தார். அதில், இந்து அறநிலையத்துறைக்கு தகவல் தெரிவிக்காமல் ஆதீனம் தரப்பில் மதுரை ஆதீனம் அறக்கட்டளை தொடங்கப்பட்டுள்ளது. ஆதீன மடத்தின் சொத்துக்களை அபகரிக்கும் நோக்கத்தில் இந்த நடவடிக்கை எடுக்கப்பட்டுள்ளது. 

எனவே மதுரை ஆதீனம் அருணகிரிநாதரை அந்த பொறுப்பில் இருந்து நீக்கிவிட்டு, அடுத்த ஆதீனம் நியமிக்கப்படும்வரை மடத்தின் பொறுப்புகளை இந்து அறநிலையத்துறையிடம் ஒப்படைக்க உத்தரவிட வேண்டும் என்று கூறப்பட்டு இருந்தது. 

இதையடுத்து அருணகிரிநாதர், அதே கோர்ட்டில் மனு ஒன்று தாக்கல் செய்தார். அதில், மதுரை ஆதீனம் அறக்கட்டளை கலைக்கப்பட்டுள்ளது. எனவே அந்த பெயரில் பதிவாளர் அலுவலகத்தில் மேற்கொள்ளப்பட்ட பதிவை ரத்து செய்ய வேண்டும் என்றும், மதுரை ஆதீன மடத்தில் நித்தியானந்தாவும், அவருடைய தரப்பினரும் நுழைய நிரந்தரமாக தடை விதிக்க வேண்டும் என்றும் கூறப்பட்டு இருந்தது. 

இந்த நிலையில் நித்தியானந்தா, ஒரு மனு தாக்கல் செய்தார். அதில், மதுரை ஆதீனம் அறக்கட்டளையை நானும், அருணகிரிநாதரும் சேர்ந்து சட்டப்படி உருவாக்கினோம். அறக்கட்டளையை கலைக்க விரும்பினால் முதன்மை அரசு வக்கீலிடம் முன் அனுமதி பெற வேண்டும். அறக்கட்டளையில் உள்ள எனக்கும் தகவல் தெரிவிக்க வேண்டும். 

ஆனால், அதுபோன்று எந்தவித அனுமதியும் பெறாமல் அறக்கட்டளை கலைக்கப்பட்டுள்ளது. அவ்வாறு கலைத்தது தவறு. சட்டப்படி அறக்கட்டளையை கலைக்காமல் அறக்கட்டளைக்கான பதிவை ரத்து செய்ய வேண்டும் என்று அருணகிரிநாதர் தாக்கல் செய்துள்ள மனுவை ஏற்கக்கூடாது. அந்த மனுவை தள்ளுபடி செய்ய வேண்டும் என்று கூறியிருந்தார்.

 இதற்கு அருணகிரிநாதர் தாக்கல் செய்த பதில் மனுவில், சாதாரணமாக உருவாக்கப்படும் அறக்கட்டளைகளுக்குத்தான் நித்தியானந்தா கூறியுள்ள விதிமுறைகள் பொருந்தும். இந்து அறநிலையத்துறையின் கட்டுப்பாட்டில் உள்ள கோவில்கள் மற்றும் மதுரை ஆதீனம் போன்ற மடங்களில் அமைக்கப்படும் அறக்கட்டளைகளை கலைக்க அந்த விதிகள் பொருந்தாது. எனவே சட்டப்படியான அடிப்படை காரணங்கள் இல்லாததால் நித்தியானந்தாவின் மனுவை தள்ளுபடி செய்ய வேண்டும் என்று கூறப்பட்டு இருந்தது. 

இந்த மனுக்கள் நீதிபதி கே.குருவையா முன்பாக விசாரணைக்கு வந்தன. ஆதீனம் தரப்பில் வக்கீல் நாகேந்திரன், ராமமூர்த்தி ஆகியோர் ஆஜரானார்கள். முடிவில் ஆதீனம் மனுவை தள்ளுபடி செய்யக்கோரிய நித்தியானந்தாவின் மனுவை தள்ளுபடி செய்து நீதிபதி உத்தரவிட்டார்.

 http://tamil.oneindia.in/news/2013/01/29/tamilnadu-madurai-court-dismisses-nithyanantha-168788.html

DINAMALAR NEWS

மதுரை ஆதீனத்திற்கு எதிரான நித்யானந்தா மனு தள்ளுபடி

 ஜனவரி 29,2013,00:59 IST

மதுரை: மதுரை ஆதீனத்துக்கு எதிராக, நித்யானந்தா தாக்கல் செய்த மனுவை, முதன்மை சப்கோர்ட் நீதிபதி குருவைய்யா, தள்ளுபடி செய்தார். மதுரை ஆதீனத்தை அரசிடம் ஒப்படைக்கவும், நித்யானந்தா-ஆதீனம் இணைந்து துவக்கிய அறக்கட்டளை பதிவை ரத்து செய்ய உத்தரவிடவும், மடத்தின் சொத்துகளை ஆதீனமோ, அவர் தரப்பினரோ வேறு நபருக்கு விற்க, பதிவு செய்ய இடைக்காலத் தடை விதிக்கவும் வலியுறுத்தி, இந்து அறநிலையத்துறை ஆணையர் தனபால், முதன்மை சப்கோர்ட்டில் மனு செய்தார். நித்யானந்தா இளைய ஆதீனமாக நியமிக்கப்பட்டதை ரத்து செய்யவும், ஆதீன அறக்கட்டளையின் பதிவை ரத்து செய்யவும், ஆதீன மடத்தில் நித்தியானந்தா நுழைய தடை விதிக்கவும் கோரி, ஆதீனம் தரப்பு, அதே கோர்ட்டில் மற்றொரு மனு செய்தது. அறக்கட்டளையை பதிவு செய்த தெற்கு சார்பதிவாளரையும் இணைக்க வலியுறுத்தி, நித்யானந்தா தரப்பு, மனு செய்தது. ஒரே நேரத்தில் தாக்கலான, மூன்று தரப்பினரின் வெவ்வேறு மனுக்கள் மீதான விசாரணை, நடந்து வருகிறது. இதற்கிடையில், ஜன.,8ல், நித்யானந்தா தரப்பு புது மனுவை தாக்கல் செய்தது. 

அதில்,"மதுரை ஆதீனத்திற்கு வழக்கு போடும் உரிமை இல்லை. அவர் மனு செய்தது சட்டப்படி செல்லாது. அரசின் முன் அனுமதி பெறாமல் அறக்கட்டளையை களைத்தது, விதிகளுக்கு முரணானது. அவரது மனுவை தள்ளுபடி செய்ய வேண்டும்' என கூறியிருந்தனர். இதுதொடர்பாக, நேற்று நடந்த விசாரணையில், நித்யானந்தா தரப்பின் மனுவை தள்ளுபடி செய்த நீதிபதி குருவைய்யா, பிற மனுக்கள் மீதான விசாரணையை, பிப்., 1 க்கு தள்ளிவைத்தார்

http://www.dinamalar.com/News_Detail.asp?Id=636025

Donated Land Fraudulently Shown as Purchased: 4 Nithyananda Disciples Face Enquiry from S.P.

தான நிலத்தை விலைக்கு வாங்கியதாக மோசடி : நித்யானந்தா சீடர்கள் 4 பேரிடம் எஸ்.பி., விசாரணை
 நவம்பர் 06,2012,00:08 IST
சேலம் : தான நிலத்தை, விலைக்கு வாங்கியதாக நடந்த மோசடி தொடர்பாக, நித்யானந்தா சீடர்கள் நால்வரிடம், நேற்று சேலம் எஸ்.பி., அஸ்வின் கோட்னீஸ் விசாரணை நடத்தினார். சேலம், சீரகாபாடியை சேர்ந்த விவசாயி குணசேகரன், 50. இவர், தனது 50 சென்ட் நிலத்தை, நித்யானந்தாவின் ஆன்மிக பணிக்காக, தானமாக கொடுத்து விட்டார். இதற்கான தான செட்டில்மென்ட், 2006, நவ., 30ல் நடந்துள்ளது. ஆனால், நிலத்தை, விற்பனை செய்து விட்டதாக, பத்திரப்பதிவு செய்திருப்பது தெரிந்து, குணசேகரன் அதிர்ச்சியடைந்தார். இது தொடர்பாக கேட்டபோது, நித்யானந்தா மற்றும் அவரது சீடர்கள் கொலை மிரட்டல் விடுத்தனர். பாதிக்கப்பட்ட குணசேகரன், நவ., 3 ல், சேலம் தனிப்பிரிவு போலீசில் புகார் செய்தார். நில அபகரிப்பு மீட்பு டி.எஸ்.பி., முனியப்பன், சீடர்கள் நால்வரிடமும் தனித்தனியே விசாரணை நடத்தினார்.
தொடர்ந்து, சேலம் எஸ்.பி., அஸ்வின் கோட்னீஸ் நேற்று விசாரணை நடத்தினார். இதில், நித்யானந்தா சீடர்களும், தியானபீட நிர்வாகிகளுமான நான்கு பேர், விளக்கமளித்தனர். அப்போது, 25 ஆயிரம் ரூபாய் நிலத்தை வாங்கியதற்கான, பத்திரப்பதிவு நகலையும் வழங்கினர். இந்த ஆவணம், நில அபகரிப்பு மீட்புக்குழுவுக்கு அனுப்பப்பட்டு, சோதனைக்கு உட்படுத்த உத்தரவிடப்பட்டுள்ளது. விசாரணைக்காக, நேரில் வந்து செல்ல வேண்டும் என, அறிவுறுத்தி, சீடர்கள் அனுப்பி வைக்கப்பட்டனர். எஸ்.பி., அஸ்வின் கோட்னீஸ் கூறுகையில், ""நில மதிப்பு வழிகாட்டிபடி, இந்த நிலம் வாங்கப்பட்டதா, விலையை குறைத்து வாங்கி மோசடி நடந்துள்ளதா, பத்திரப்பதிவு நடந்தது உண்மையா என்பது போன்ற பல்வேறு கோணங்களில் விசாரணை நடத்த உத்தரவிடப்பட்டுள்ளது. முடிவில், மோசடி நடந்திருப்பது கண்டுபிடிக்கப்பட்டால், சட்ட ரீதியாக அடுத்த கட்ட நடவடிக்கை மேற்கொள்ளப்படும்,'' என்றார்.

http://www.dinamalar.com/News_Detail.asp?Id=580289